ޝުޖާއު އަލީ ނިސްބަތްވަނީ ފެލިދޫ ދާއިރާގެ ދެ ރަށަކަށެވެ. އޭނާގެ ބައްޕަ އަކީ ވ. ފެލިދޫ ރަންކޮކާގެ، އަލް މަރްހޫމް އަލީ ހުސައިން އެވެ. މަންމަ އަކީ ވ. ތިނަދޫ ދިލްބަހާރުގެ، ޒަރީނާ މުހައްމަދެވެ.

ޝުޖާއުގެ ބައްޕަ އަލީ ހުސައިން އަކީ ވ. އަތޮޅަށް އެކި ރޮނގުރޮނގުން ހިދުމަތްކުރައްވާފައިވާ އަތޮޅުގެ އަގުހުރި ހިދުމަތްތެރިއެކެވެ. ފެލިދޫ މުދިމު ކަމާއި ފެލިދޫ ކަތީބުކަން ވަރަށް ގިނަ އަހަރުތަކެއް ވަންދެއް އޭނާ އަދާކުރައްވާފައިވެ އެވެ. އަދި ވ. އަތޮޅުގެ ރައްޔިތުންނާއި ގުޅޭ އެތައް ކަމެއްގައި އެ ދުވަސްވަރު އެންމެ އިސްކޮށް ތިއްބެތި ހިދުމަތްތެރިންގެ ލިސްޓުގެ އެންމެ ކުރީގައި އަލީ ހުސައިން ހިމެނިވަޑައިގަންނަވަ އެވެ.

ދެ ރަށަށް ނިސްބަތްވުމުގެ ސަބަބުން ޝުޖާއު އުޅެ ބޮޑުވީ "ދެ ރަށް ދެމެދު"ގަ އެވެ. އޭނާގެ ތައުލީމީ ހަޔާތް ފެށުނީ ވ. ތިނަދޫ ސްކޫލުންނެވެ. އަދި ސާނަވީ ތައުލީމު ފުރިހަމަކުރެއްވީ ވ. އަތޮޅު ތައުލީމީ މަރުކަޒުންނެވެ. ޝުޖާއު ހިމެނިވަޑައިގަންނަވަނީ ވ. އަތޮޅުގެ ތާރީހުގައި ވެސް އަލަށް އަތޮޅުގައި ސާނަވީ ތައުލީމު ފުރިހަމަ ކުރި ދަރިވަރުންގެ ލިސްޓުގަ އެވެ. ސާނަވީ ތައުލީމު ހާސިލްކުރެއްވި ދުވަސްވަރު ވެސް ޝުޖާއު ފަހަގަކުރެވިފައި ވަނީ ސްކޫލުގެ ހުރިހާ ގޮތަކުން އެންމެ ރަނގަޅު ދަރިވަރުގެ ގޮތުގަ އެވެ.

ޝުޖާއު ސާނަވީ ތައުލީމު ފުރިހަމަކުރެއްވުމަށް ފަހު އަތޮޅަށް ހިދުމަތްކުރެއްވުމުގެ މަސައްކަތް ފެއްޓެވި އެވެ.

ޔޫއެންޑީޕީގެ ފަރާތުން ވ. އަތޮޅުގައި ހިންގި "އެޓޯލް ޑިވެލޮޕްމަންޓް ފޯ ސަސްޓެއިނަބަލް ލައިވްލީހުޑްސް" މަޝްރޫއުގައި އޭނާ މަސައްކަތްކުރެއްވި އެވެ. އެ މަޝްރޫއުގެ ދަށުން ހިންގުނު ވ. އަތޮޅުގެ ރައްޔިތުންގެ ތަރައްގީގެ ޕްރޮގްރާމް އަދި ވ. އަތޮޅުގެ ރައްޔިތުންގެ މާލިއްޔަތު އިތުރުކުރުމަށް ތަފާތު ޕްރޮގްރާމްތައް ރާވާއި ހިންގުމުގައި އޭނާ މަސައްކަތްކުރެއްވި އެވެ. އަދި 2003 އިން 2007 އަށް ވ. އަތޮޅުގެ ތަރައްގީގެ ޕްރޮގްރާމް ހިންގެވުމުގެ މަސައްކަތްކުރެއްވުމަށް ފަހު، ލިބުނު މަތީ ތައުލީމުގެ ފުރުސަތުގައި މެލޭޝިއާ އިން ފުރަތަމަ ޑިގްރީ، ވިޔަފާރި އާއި ހިންގުމުގެ ދާއިރާއިން އަދި މާސްޓަސް ޑިގްރީ ފަތުރުވެރިކަމާއި ހިދުމަތްދިނުމުގެ ދާއިރާއިން ހާސިލްކުރެއްވި އެވެ.

މަތީ ތައުލީމު ހާސިލުކުރެއްވި ދުވަސްވަރު ވެސް އަތޮޅުގެ ކަންތައްތަކުގައި އެންމެ އިސްކޮށް އޭނާ ހަރަކާތްތެރިވި އެވެ.

އެ ދުވަސްވަރު އަލަށް މީހުން ދިރިއުޅޭ ރަށްރަށުގައި ފަތުރުވެރިކަން ކުރުމަށް ގެސްޓްހައުސް ހިންގުމަށް ގާނޫނުން ލިބުނު ފުރުސަތުގައި ވ. އަތޮޅުގައި ފުރަތަމަ ރަޖިސްޓްރީ ކުރެވުނު ގެސްޓްހައުސް ކަމަށްވާ ވ. ތިނަދޫގައި ހުންނަ "ކަސާ ބަރާބަރު" ހިންގުމުގައި އޭނާ މަސައްކަތްކުރެއްވި އެވެ.

ޝުޖާއު ހިމެނިވަޑައިގަންނަވަނީ ވ. އަތޮޅުގައި އަދި ރާއްޖޭގައި ވެސް "ރަށު ފަތުރުވެރިކަން" ހިންގުމުގެ އެންމެ ތަޖުރިބާ ގިނަ ބޭފުޅުންގެ ތެރޭގަ އެވެ.

ޝުޖާއު ވިދާޅުވީ ގާއުމީ ވިސްނުމުގައި ރައްޔިތުންގެ ދިރުއުޅުން އުފާވެރިކޮށްދޭނެ ގާނޫނުތަކެއް މުހިންމު ކަމަށެވެ. އަދި ރައްޔިތުންގެ ވެރިންގެ ގޮތުގައި ރައްޔިތުން ތަމްސީލުކުރުން އެއީ އިހްލާސްތެރިކާމާ އެކު ނޫނީ ނުވާނެ ކަމެއް ކަމަށާއި އަބަދުވެސް އާންމު ރައްޔިތުމީހާގެ ވިސްނުން އިސްކޮށް އެމީހުންނަށް ރަނގަޅުވާނެ ގޮތްތައް ގާނޫނުތަކުން ހޯދަން އޭނާ ވަކާލާތުކުރައްވާނެ ކަމަށް ވިދާޅުވި އެވެ.

"ވ. އަތޮޅަކީ އަޅުގަނޑުގެ އަމިއްލަ އަތޮޅު ކަމުން، މި އަތޮޅަށް އަބަދުވެސް އަޅުގަނޑު ވަރަށް ލޯބި އޮވޭ. އަތޮޅަށް އެ އިރަކަށް އަޅުގަނޑުގެ ހިދުމަތް ބޭނުންވާ ކޮންމެ ދާއިރާއެއްގައި ހިދުމަތްކުރުމަކީ އަޅުގަނޑަށް ލިބޭ އުފަލެއް. ވ. އަތޮޅުގެ އަދި ފެލިދޫ ދާއިރާގެ ރަށްތަކުގެ ތަރައްގީގެ "އޭރާއި މިހާރު"ގެ ވާހަކަތަކުގައި ވެސް އަޅުގަނޑުގެ އާއިލާއާ ގުޅުން ބޮޑު. އެހެން ކަމުން އަޅުގަނޑުގެ އުއްމީދަކީ އަޅުގަނޑުގެ ބައްޕަ އަދި ބޭބެމެން ވ. އަތޮޅަށް ކޮށްދެއްވި ފަދަ ހިދުމަތްތަކެއް އަޅުގަނޑުގެ ފަރާތުން ވެސް ވ. އަތޮޅަށް ޓަކައި ކޮށްދިނުން. އަޅުގަނޑުގެ ހިދުމަތް ވ. އަތޮޅުން ބޭނުންވާ ކޮންމެ ދަނޑިވަޅެއްގައި، ކޮންމެ ދާއިރާއެއްގައި ވެސް އަޅުގަނޑު ހުންނާނީ ވ. އަތޮޅަށް ހިދުމަތްކުރުމަށް ތައްޔާރަށް،" އޭނާ ވިދާޅުވި އެވެ.

"ފެލިދޫ ދާއިރާގެ ރައްޔިތުންގެ މަޖިލީހުގެ ގޮނޑިއަށް ވާދަކުރުމަށް އަޅުގަނޑު ނިންމީ ވ. އަތޮޅުގެ މަސްލަހަތުގައި އެންމެ ރަނގަޅަށް ވަކާލާތު ކުރެވޭނީ އަތޮޅަށް ފަރިތަ، އަތޮޅުގެ ހާލަތު އެނގޭ އަދި ރައްޔިތުންގެ މަޖިލީހުން ކުރަން ޖެހޭ އެންމެހާ މަސައްކަތްތައް އަދާކުރެވޭނެ އިލްމީ ގާބިލުކާއި ތަޖުރިބާހުރުމާ އެކު، މިއީ ވ. އަތޮޅުން ވ.އަތޮޅުގެ އަޑު އިއްވުމަށް ނިކުންނަންވީ ވަގުތު ކަމަށް ގާބޫލުކުރާތީ."