އުމުރުން 30 އަހަރުގެ އަހްމަދު އަޒާން މަރްޒޫގް އަކީ އައްޑު އަށް އުފަން ޒުވާނެކެވެ. މެދު މަދަރުސީ ތައުލީމް އޭނާ ނިންމީ އައްޑޫއިންނެވެ. އޭގެ ފަހުން މެލޭޝިޔާގެ ކާޓިން ޔުނިވަސިޓީން މީޑިއާ ސްޓަޒީން އިން ފައުންޑޭޝަން ހެދުމަށް ފަހު އަޒަރުބައިޖާންގެ ސަރުކާރުން ލިބުނު ސްކޮލަޝިޕެއްގައި އެ ގައުމުގެ އަޒަރުބައިޖާން ޑިޕްލޮމެޓިކް އެކެޑެމީން އިންޓަނޭޝަނަލްގެ ދާއިރާއިން ތައުލީމު ހާސިލްކުރި އެވެ.

ތިމާވެށީގެ މުހިންމުކަމާއި މަސްތުވާތަކެތިން ދުރުހެލިވުމަށް ހޭލުންތެރިކުރުވުމަށް އައްޑޫގެ އިޖުތިމާއީ މަސައްކަތުގައި އޭނާ ހަރަކާތްތެރިވި އެވެ. އަދި އޭނާ އަކީ "އައްޑޫ ލައިވް" މީޑިއާގެ ފައުންޑިން މެމްބަރެކެވެ. މަދަރުސީ ދައުރުން ފެށިގެން އައްޑޫގެ ތަރައްގީ އާއި ގުޅޭ ގިނަ ކަންކަމުގައި އޭނާ ޝާމިލުވެ އުޅުނެވެ.

ދިވެހި ރެޑްކްރެސެންޓްގެ އިޖުތިމާއީ ދަރުމަވެރިއެއްގެ ރޯލު އޭނާ އަދާކޮށްފައިވެ އެވެ.

އަޒާން އަކީ ދިޔަރެސް ނޫހުގެ ފައުންޑިން މެމްބަރު ވެސް މެ އެވެ. އަދި ސަރުކާރު ޖަވާބުދާރީ ކުރުވުމަށް ނޫސްވެރިއެއްގެ ހައިސިއްޔަތުންނާއި އާރުޓީއައި އެކްޓިވިސްޓެއް ގޮތުގައި އޭނާ ހަރަކާތްތެރިވި އެވެ.

"ރައްޔިތުންނަށް ޖަވާބުދާރީވާނަން އަދި ސަރުކާރު ޖަވާބުދާރީ ކުރުވާނަން. އަދި މިއީ މި ސިޔާސަތާއިގެން މި ދާއިރާއަށް ކެމްޕެއިން ކުރާ ހަމައެކަނި ކެންޑިޑޭޓް،" އޭނާ ބުންޏެވެ.

- ރައްޔިތުންގެ މަޖިލީހުގެ މެމްބަރުންނަކީ ރައްޔިތުންނަށް ޖަވާބުދާރީވާ ބަޔަކަށް ހެދުމަށްޓަކައި މެމްބަރުންނަކީ ރައްޔިތުންނާއި ވަކި އުސޫލެއްގެ ތެރެއިން މަހަކު އެއްފަހަރު ބައްދަލު ކުރަން ޖެހޭ ބަޔަކަށް ހެދުމަށްޓަކައި ރިކޯލް އެކްޓު ހެދުން.

- މެމްބަރުންގެ ހާޒިރީއަށް ނޫނީ މުސާރަ ނުހިނގާ ބަދަލު ގެނައުން.

- އައްޑޫގެ ތަރައްގީ އަށް ސަރުކާރުން ރާވާފައިވާ ކަންކަން ހިނގާނެކަން ކަށަވަރުކުރުން.

- އެކަންކަން ނުވާ ނަމަ, ރައްޔިތުންގެ ސަފަށް ނިކުމެ ހައްގު ބަސް ބުނާނެ ފުރަތަމަ މެމްބަރަށް ވުން.

- ކޮރަޕްޝަން ހުއްޓުވަން ގަދައަޅާ މަސައްކަތް ކުރުން.

- ގައުމުގެ މިނިވަންކަމާއި އިސްތިގުލާލަށް ނުރަނގަޅު ނުފޫޒުތައް ފޯރުވުން ހުއްޓުވަން ގާނޫނީ ބަދަލުތައް ސަރުކާރާ ގުޅިގެން ގެނައުން.

- މީހެއްގެ ޕަޕެޓަކަށް ނުވުން.

- ޕާޓީ ޓިކެޓުގައި ހޮވުނަސް، މަސައްކަތް ކުރާނީ ރައްޔިތުންގެ މަސްލަހަތު އިސްކޮށްގެން.